Nici, mi vinni un nolitu di futtiri all'inglisa; già sugno infucatissimu: guarda chi minchia tisa! Lu gustu è insuppurtabili, li tasti non discordi: in chistu modu futtinu li nobili milordi. La sorti è già propizia semu suli suliddi; stanotti avemu a futtiri li gigghia e li capiddi. A manu a manu curcati; lu lettu è già cunzatu, non cci haju chiù pacenzia, pri mia sugnu spugghiatu. Veni ccà, figghia! Curcati! Spinciti tanticchiedda; li to labbruzza dunami, dammi nna vasatedda. Nici, fa prestu;dunami sta duci to linguzza; ntra la mia vucca trasila, facemu la sirpuzza. Sti cosci toi,sti natichi sunnu nna vera tuma; li minni su' dui provuli, chiù bianchi di la scuma. Ma senza tanti chiacchiari, futtemu allegramenti; non servi accussì perdiri st'amabili momenti. Mettiti a facci all'aria, chista è la forma arcana; li bianchi cosci gnuttica a modu di nna rana. Supra li mei claviculi posa li toi manuzzi, e a li mei cianchi strinciti, ed iu a li to spadduzzi. Chi vera matematica! Chi calculu profunnu! Oh, comu si combacianu lu cazzu ccu lu cunnu! Ma già serruli serruli la virga s'introduci, e mentri trasi s'eccita lu gustu lu chiù duci. Comu s'abbassa l'utero sinu all'imboccatura, chi brama di sucarisi l'umana rennitura! Dunca futtemu nsemula, iu fricu e tu cazzii; fammi sautari all'aria finu ca ti nichii.

Va, veni, Nici; baciami, cazzia... mi veni... è lestu; già mi currumpu, strincimi, abbrazza, futti prestu! Eccu chi cadi sazia la minchia a passuluni; la testa posa languida pri supra li cugghiuni. Sacciu chi è to lu geniu quannu la minchia è muscia! Forsi pirchì rallentasi a guisa d'una truscia? Te', ccu dui jita pigghiala e fanni chi nni voi; a lu to sticchiu adattala, fricala quantu poi. Ma già rinviguriscinu li musculi e rutturi; lu cazzu arreri fulmina di futtiri a fururi. Senza chiù tempu perdiri, mettiti arreri a lenza; te', st'autra vota pigghiati stu restu di simenza. Cazzu! Chi beddu futtiri, chi gustu prelibatu! Chistu è lu veru futtiri: l'Inglisi sia lodatu!